ساعات باحس بيك أسير
وساعات أمير راكب فرس
وساعات بتحكي معايا يووووووه
وساعات كتيرة بتنخرس
وساعات باحس بيك لا شيئ
وساعات باحس بيك ولي
ياريت يا ليل ما تنجلي
يا ليل بيرشيني النهار
وعاوزني قال أقطع وصالك
وناسي إني من رجالك
يعني الجميع رهن الإشارة
وانت الأمير وانت الإمارة
بس وحياة السهاري العاشقين
إطربنا يا ليل الحزين
وغني من أجل الحضور
من زمان والقلب بور وانت السبيل
وانت الدليل
لكل عاشق تايهة منه سكتة
وانت الجميل وانت المغني
لو مين يغني
تغني انت تسكته
موال يا ليل
بس يا خسارة بخيل تجري بساعاتك
بس وحياتك مسامحك
حتي لو كلك مرار
بلاش في يوم تاخد قرار
إنك تبيعني للنهار
وإذاي تبيع
وانا قلبي بيت سكنه الجميع
من غير تمن
وانت الجميع
وانت كمان المؤتمن
علي سري فيك
Post A Comment: