قراءة عن فيلم تينيت.. بقلم محمد طارق كاتب من مصر

المفترض ان في حرب عالمية تالتة هتحصل في المستقبل، وجماعة ما بتكتشف ذلك عن طريق بعض مخلفات الحرب التي تأتي من المستقبل، هناك اتنين مجندين من احدي اجهزة المخابرات بيحاولوا منع هذه الحرب بالرجوع في الزمن بس بطريقة غريبة عن الطرق المعتادة التي نعرفها. في وسط كل ذلك كريستوفر نولان بيحاول توظيف بعض الأعيب الزمن التي يحبها ويعشقها، ولكن اللعبة هذه المرة كانت مختلفة كل الاختلاف عن الألعاب السابقة التي رأيناها في كل افلامه السابقة زي انسبشن وانترستلر وبريستيج، هذه المرة بيحاول عكس الزمن وده هيفاجئك جداً لما تشوف الفيلم. باختصار ده الإطار العام اللي بيدور فيه الفيلم.

الفيلم مش صعب خالص زي ما الناس بتحكي وبيقولوا انه معقد ومش بيتفهم من اول مرة، الفيلم بس محتاج انك تركز فيه كويس وميفوتش عليك اي تفصيلة لان في بعض التفاصيل الصغيرة لو مركزتش فيها مش هتقدر تفهم بعض النقاط في الفيلم.

المزيكا بتاعة الفيلم عظيمة جداً كالعادة مع نولان، اداء الممثلين قوي جداً ويحسب لنولان انه استخدم ممثلين مش صف اول وجازف بيهم في عمل زي ده، ولكنهم كانوا علي مستوي الفيلم ولم يخذلوه، بالنسبة بقي للتصوير والإخراج انا مش هتكلم كتير بس هقولك ان في كادرات معينة في الفيلم ممكن تتاخد وتتعمل لوحات فنية.

عموما التجربة كانت ممتعة ومختلفة كعادة السينما اللي بيقدمها كريستوفر نولان، ادخلوا الفيلم واستمتعوا بيه ومتسمعوش كلام حد وانك لازم تكون دكتور في الفيزياء ودارس طاقة نووية والافورة الفارغة دي، حاولوا تدخلوا الفيلم وهو لسة في السينما علشان تقدر تستمع به بكامل جودته التصويرية، لان نوعية الافلام دي لما بتنزل علي المواقع مش بتكون بنفس الجودة وهتفقد كتير من جودتها.