-------------------------------------------
ساكناك من الوجع القديم
من عهد حب الناس و حب الاحتياج
كل النايات اللي ف صوتها صاحبتك
غنيتلها كل الغنا
شارب حنينها من ضمير الحب ولحد الوجع
يا مبتلى بالود و الضد الحصين
مين اللي شايل ضحكتك جوه النهار
يا ناكر الشر اللي زاد
و مصدق الايام سماح
سيب النهايات السعيده لوقتها
و ارتارح لحته تروحلها
و خليك عيون
يمكن يشوفوك الحقيقه يصدقوك
الناس باعوك
علشان بيشتروا بيك الضلال
الف احتمال للخوف بيقلق ضحكتك
كل المواعيد القديمه اللي اتلغت
بتروحها وحدك ليه بقى؟
غاوى شقا؟
ولا الحقايق اللي شالت محنتك
عايزاك تحل اللغز و تروح للملك
ايه ينفعك
غير الكلام اللي انت شايله
ف الوريد
و حصان بليد
و كتاب هوى
كل الحاجات متنتوره منك عليك
و الحرب فيك
انت بايدك تنتهى
او تعلن العصيان عليك
يا يوم معاك
و يوم عليك
سيب الصحارى للي عارف دربها
قوم قولها
هو انتى ليه حلوة بدون اي اختلاق للمشكله
حلوة و بس
و كان عينك من تلابيب الوطن
عينك سكن
وقت اما نادانى الرحيل
عينك ف قلبي بس قلبى
مش بيختار البصر
ولا الحياه
قلبي اللي مضطر انه يوصل رحلته
لو مين ناداه
ما يحيدش يوم
زي الهوا
يجيك ف يوم
عشان نصيب انه يجيك
Post A Comment: