نصحت كتير وليه دايماً
لنصحي تملي مش راضي
وخفت كتير عليك يا ابني
يضيع تعبك على الفاضي
تعبت سنين عشان خاطرك
وشيلت الهم من صغري
وعشت انا رهن لإشارتك
عشمت انك تكون ضهري
لقيتك مرة واحدة قسيت
وشفتك عكس ما اتمنيت
وفجأة بعدت عن حضني
بكل سهولة سيبت البيت
وحتى نسيت تودعني
بكلمة ولا حتى سلام
ما همك قلبي يوجعني
واصارع قسوة الأيام
وعايشة حزينة انا ف بعدك
ومن بعدك باشيل الهم
خلاص أصبحت مش فارقة
ولا ينفعش حضني يضم ؟
مجرد واحدة ع الهامش
ومش فارقة معاك أصلاً
ولا بيها باقيت تهتم
وانا اللي عشت طول عمري
معاك صاحب وأب وأم
وكنت لك سند وأمان
في وقت الحزن بحر حنان
ووقت الشدة موجودة
بتلقاني في كل مكان
ف ليه طبعك بقى قاسي
صبح قلبك حجر صوان
وليه تعمل ما بينا حدود
وليه تبني ما بينا سدود
دا انا عايشة عشان خاطرك
وباتمنى لحضني تعود
دا انا وانت يا واد أحباب
وباتمنى تدق الباب
وقلبي ساعتها يفتح لك
وهانسى أي لوم وعتاب
Post A Comment: