أحبابي وخلاني...
أجيو نحكيلكم على واحد الصبية
كانت تفرح بالعيد وتغني كلّ ما عطاوها أحبابها العيدية
كانت تلبس اللباس الجديد وتلعب مع صحاباتها حابتة والشرطة والألعاب الشعبية
كبرت الطفلة شوية بشوية
قبل العيد بأيام... أصبح تنظيف البيت واجب من الصباح للعشية
وتحضير الحلويات وشراء أجمل جلابية
الجلابية المغربية الأصيلة هي في الأصل هدية
أجمل هدية من باباها الغالي وأمها الغالية
ونهار العيد تفيق في الفجر تزين البيت وتلبس الطابلية
تدخل للكوزينة وتوجد المأكولات الشهية
تبارك العيد لأحبابها وتشاركهم الفرحة وتوجد لهم أتاي والصينية
وجا النهار اللي زار المكتوب الشابة المغربية
تزوجت وسافرت لبلاد الحق والحرية
قطعت البحور مع فارس أحلامها بحسن نية
الشابة المغربية تعلمت اللغة الهولنية
ودرست وقرات وخدمت في البلاد الأجنبية
العيد اللي كان يجمع فرحة الأحباب تنشطو الأغاني الأندلسية
وَلَّى عيد ناقصاه اللمة الأسرية
أصحابها الأوروبيون حسوا بغربتها وشاركوها أتاي وحضروا معها الصينيىة
شكروها على الحلويات اللذيذة ومنهم اللي جاب معاه البسبوسة التركية
هاد العيد لونه مختلف لكن طعمه زوين بحسن التعايش والصحبة الوفية
وطبعا أحبابها ماتركوهاش وحدها وشاركوها الفرحة عبر الفيديوهات الأثيرية
سنين وهي تفرح بالعيد في بلاد الغربة مع اللي ديانتهم الإسلام واليهودية والمسيحية
وجا اليوم اللي الناس بقاو يعيدو بعيد على حبابهم ويتابعوا أخبار الجائحة في القنوات الفضائية
من نهار اللي زارتهم ضيفة ثقيلة يقولوا سميتها كورونا سدت الحدود وسجنت العالم في علبة حجرية
واللي ماصدقوش أن كورونا موجودة احتفلوا بالعيد وجمعتهم اللمة العائلية
لكن بعد أيام صابهم الوباء ومانفعهمش دوا الصيدلية
عرفوا حق العلم والطب لكن بعد ما كبرت القضية
عرفتوا شكون هي هاد الصبية؟
اللي هادي سنين وهي في بلاد الغربة مع ناس عاملوها بحال بنتهم البكرية؟
هاد البنت هي أنا وأنتَ وأنتِ وكل واحد ذاق مرار الغربة سواء في بلاده أو في بلاد أجنيبة
نوصيكم يا أحبابي وخلاني واحد الوصية
نهار العيد ماتنساوش اللي مقطوع من شجرة واللي بعيد على حبابه واللي محتاج للحنية
ماتبخلوش عليهم بالابتسامة والكلمة الطيبة سواء كانوا عايشيين في الأحياء الراقية أو الشعبية
هادي وصيتي لكم تفكروني بها ودْعيوا معاي في صلاتكم صباح وعشية.
Post A Comment: