( يَا دُنيـــَــا .. خِفِّي ..!! ) | بقلم د./ جنات إياد و د.مهندس/ إياد الصاوي

( حوار أسري بين زوج وزوجته  .. على طريقة الشعر المحكي

 " العامية المصرية " ..!!

""""""""""""""""""""""""""""""

علي :

"""""""""

يا دنيا ليه مِعندانِي  ..

وحيرني أكل العيش ..!

وكل يوم تعبان  ..

بحسب ولاقي مفيش ..!

ولحد امتى كده ..

قوليلي متخبيش ..!

هبة :

""""""""

متحمد ربنا يا خَيّ ..

ليك عود سليم مفرود ..!

الدنيا مر وصفا ..

مش جري وحوش وأسود . !

واللي برزقه اقتنع  ..

له رب كريم بيجود ..!

علي :

"""""""""

صبري غلب أيوب ..

ما أنا ع الفقر متصاحب ..!

ومفيش ف إيدي فلوس ..

والفقري قليل صاحب ..!

والدنيا مع الندل تمشي ..

وتتضحك وتتصاحب ..!

هبة :

"""""""""

صبر إيه يا خَيّ ..

دا معرفتلوش معنى ..!

دا طمع وقلة دين ..

وكلامك مصدعنا ..!

وربك لولا لطيف ..

أرضه ما هتسعنا ..!

علي :

""""""""""

صدري ضاق م الهم ..

والشكوى لمن خلقه ..!

وناس على ناس بتضحك ..

وناس متعلقة ف فلقه ..!

هبة :

"""""""""

يا راجل كفاية ..

حرقتنا بنفخك ..!

واحمد ربنا على صحتك ..

وبوس كفك ..!

دا كفاية ربك عن ..

سؤال اللئيم عفَّك ..!

علي :

""""""""""

ومنين اشتريك يا حظ ..

دا الهم راكبني ..!

دا أنا من الغلب ..

وغلبي غلِّبنِي ..!

والصدر اتملى بالآه ..

والآهة بتتعبني ..!

هبة :

""""""""""

الهم فارس شديد  ..

ما يركب غير الموكوس ..!

اللي بيحسب دنيته ..

دهب كتير وفلوس ..!

والفانوس عمره ما ينور ..

لواحد يكون منحوس ..!

علي :

""""""""""

أنا نفسي يوم ارتاح ..

عمالة ألف وادور ..!

وابني ديوان عالي ..

ليه باب جنينه وسور ..!

واركب الخنزيرة ..

وبالريموت بتدور ..!

هبة :

""""""""

المال هيبني البيت ..

لكن ميشتريش راحة ..!

ياما ناس معاها فلوس ..

ولا شافت ف يوم راحة ..!

الدنيا تاخد وتدي ..

بس امشيها بالراحة ..!!

علي :

"""""""""

داويتي قلبي ياللي مفيش منك ..

يخليكي ليا سند وميحرمنيش منك ..!

***********************