الشاعر المصري محمود نبيل العيساوي يكتب (كِلمة في سِر الإنسان)

---------------------------------

امبارح وأنا بقطع آخر طرف في طرق الوهم الملفوفة على رقاب الخَلق؛ بالصدفة عرفت إن الإشكال مش في المادة،  وإن الإنسان شيطان نَفسه،  وإن المتساب في الليل وحديه أخطر ع الكون من الليل نَفسه، امبارح عَقَد الإنسان النية يدب الأرض يشق سرايب نعناع ولمون وزتون أخضر  يشبه أمله في صوته الحَي.

 امبارح:

 فاق الإنسان 

شاف الإنسان 

رسم الإنسان .

غير الإنسان 

عرف الإنسان 

إنه كإنسان 

رهن النسيان 

رَهَن الإنسان 

روح الإنسان

فِهِم الإنسان 

سِر الإنسان 

خبَّط كفينه بجنبين راسه اتكب الدمع في قلب الغايب واخد سره معاه.

امبارح

كان آخر ليل يِقطع 

على وش الصبح صداه 

ويحِد مداه 

يحلف بالله 

ما يسيبله طريق غير بعد العهد:

- هات اليمين ياصبح ما تنسي اللي قال سَلَّمْتْ

- احلف كمان يا صبح على عيش الغلابة: 

إن اللي خطفه الليل 

من ذاته يترد لهداه 

ـــــــــــــــــــــــــــــــــ 

مين اللي قال يابكرة هنشوفك ونسكت؟

ده احنا شايلينلك شكاير قول 

"بس أما تيجي وأنا"

هفتح دفاتر صبري ع الأيام 

وأديك توزع للي جاي بعديك 

مين اللي شاف الكلمة بتعافر وتبهت

ومشالش هم الليل في ريحها يطول 

بس إنت تيجي 

هطرح عليك الحق والأوهام 

بس إوعى زيف المظلمة يِعْديك

ـــــ

ارمي اليمين يا صبح 

وارمي الخيوط فينا 

نمشي طريق الصُلح

مِتْزَانة خطاوينا