الشاعرة المصرية راندة محمود تكتب قصيدة تحت عنوان "مديت ايدك"
مديت ايديك للناس
واتأذيت؟
ياما غطيت عيوب
واتعريت؟
افتكرت غيرك فى الخير
واتنسيت؟
فضلت تدى و تدى
كتير اديت؟
عملت خدك مداس
اتعدى فوقيك
و اترميت؟
وقت الحاجة اتشفت
وفى الراحة
اختفيت؟
كنت للناس سند وسور
وبيت؟
لكن هما كانوا عود مكسور
مسكت فيهم
فى البير هويت؟
لا بطلت تعمل خير
ولا حرمت و قسيت
قلبك فضل يسامح و يعدى
ويقول يا ريت
بأيدى اكتر كنت زودت
ما عديت
لا ريقك مرة نشف
ولا سبت الدنيا و هجيت
ولا عقلك طار و مشى
ولا من النداهة اتنديت
يا بختك ياللى تعمل الخير
وما تستنى اجر اللى عطيت
كفاية دعوة تدعى
للى على ايدهم اتربيت
Post A Comment: