الشاعرة المصرية راندة محمود تكتب قصيدة تحت عنوان "بخاف من شاكى"
كل حد فينا جواه شاكى
عروسة حلوة لطيفة
لكن ساكنها شيطان
فى العادى الحب و الطيبة
اللى جواكى مفرحاكى
....الناس حباكى
بس حبة تزعلى تزمجرى
وده تحذير قبل ما يطلع الكبير
ولو وصل الامر للغضب
اللى زعلك يبقى للنار حطب
وتبدا الخطط ح دمره
ح اقطعه حتت حتت
والكلام يتقال كتير
ما خلاص مفيش تفكير
جه وقت التدمير
وبعد حبة ولما تهدى حبه
ما تعرفيش ترجعى الكلام
مليون علامة استفهام
ليه انا ببدا بالغلط
اخر عبط
بخاف من شاكى اللى جواية
لو خدتنى الغيرة
نار تخرج من مناخيرى
ومن عيونى الكبيرة
تنانين بتطير فى دماغى
بتغطى على عقلى الواعى
وتبدا العابى النارية
بصوت يهز السما
ويحرق اللى خلتنى اغير
و خلت برج من عقلى يطير
وبعد حبة لما بهدى حبة
الاقيها كانت حبة
و عملت منها قبة
اروح فين استخبى
من شاكى
بخاف من شاكى
لو اخدنى الشك
ببقى مليون مخبر و جاسوس
ببقى القاضى و المحامى واللصوص
واحضر المرافعة واراجع النصوص
وابقى اجاثا وابقى كلومبو
وقبل ما يجى النهار وفى عز الليل
البرئ يكون متهم و من غير دليل
وبعد حبة ولما بهدى حبة
مبالاقيش قضيه
ربنا يستر عليه
كله من شاكى
وبعدين معاكى
ازاى اخلى شكلك اللطيف
ازاى اتخلص من شيطانك المخيف
ازاى اعرف تبقى تحت السيطرة
ازاى الزعل والغضب والغيرة والشك
يبقى بطريقة متحضرة
مش عك فى عك
والحل الاسرع ومن غير ضر
ارمى شاكى من جواكى
ويا دار ما دخلك شر
Post A Comment: