الشاعرة / كوثر صاگم تكتب زجلًا تحت عنوان "بحر الحب" 




 بحر الحب هايج و عميق 

شحال غرقات فيه من سفينة

وشحال من عوام 

رجعت لو بالندامة

يا الداخل ليه، لاثيق

يغرك سحرو وتغرك  الزعامة

عنداك تقول انا عوام..

والبحر ليا صديق

إلا انت حلمتي تعوم فيه

 غير نسى ذيك لمنامة 

شحال من عاشق

قبلك، بات مهموم

شمسو ولات غمامة

الحب الصادق  يشعل..

فقلب كل عاشق حريق 

واللي سكنو فيوم

غير يطلب من الله السلامه

الحب  يا ناس سرو ما مفهوم

حاروا فيه  حتى العلما

فرحة الحب تخليك حالم

فمنامتك، ما تبغي تفيق

وتخليك تحس باللي انت طير

 طاير محلق فالسما    

ويلا جاتك الصدمة مل حبيب

يولي الحزن ليك رفيق

يخلي فقلبك وشمة وعلامة

سهام الحب، كلها وكيف صابتو

كاين اللي من كلمة

وكاين اللي من نظرة 

وكاين اللي غير من ابتسامة

بحر الحب، عالم مجهول

والداخل ليه..

لازم يعرف فين داخل

حيت الحب، يا جنة

يا سجن مظلام

بلا حكم قاضي 

وبلا محاكمة


الشاعرة / كوثر صاگم تكتب زجلًا تحت عنوان "بحر الحب"


الشاعرة / كوثر صاگم تكتب زجلًا تحت عنوان "بحر الحب" 





Share To: