الشاعر المصري / هاني حسن يكتب زجلًا تحت عنوان "فردة حلق"
قصة حقيقية
فردة حلق
لقاها اخويا لما كنا صغار
فردة حلق
واحنا بنلعب يم باب الدار
ابويا شالها وقال أمانة عندنا
صون الامانة ده من عاداتنا وشرعنا
واللي يخاف من ربه عمره ما جار
انا قلت يابا نبيعها تفك زنقتنا
قاللي ومن امتى الحرام يعرف طريق بيتنا
النفس طالبة السوء بس احنا بنعافر
مهما الزمن غيرك خليك في سكتنا
لحد ما في يوم القدر بعت صاحبتها
اديتنا اوصاف الأمانة وجات وخديتها
بصيت لابويا وقتها
لقيته فرحان زيها
ان الامانه اتسلمت
وإن اختبار ربه انتهى
من وقتها .. عرفت ابويا ومعدنه
وعرفت ليه ساكنين إيجار
في وقت كل الناس بنوا
فردة حلق مكنتش هي المشكلة
دي كانت سبب علشان نحل الاسئلة
الشاعر المصري / هاني حسن يكتب زجلًا تحت عنوان "فردة حلق"
Post A Comment: