الشاعرة المصرية / راندة محمود تكتب زجلًا تحت عنوان "مين ح يحبنى غيرك؟"
سألتنى بنتى لو جرالك حاجة
مين ح يحبنى غيرك؟
ح افرد جناحى و ابقى طير مين
بعد ما كنت طيرك؟
ح ابقى الأولى فى قلب مين؟
تمالى ح آجى بعد التانيين
مين ح يقولى يا ورد
يا ياسمين؟
فين ح استخبى بعد حضنك؟
مين ح يقولى تعالى اضمك؟
اول ما ادخل من الباب
ح امشى ورا مين بعد الغياب؟
وافضل احكى و احكى
اقول دوشتك
قلقت عيشتك
مين ح يقولى دى طلة فى وشك
بكل سنينى الجايين؟
طب ح اخد رأى مين
فى لبسى اللى اختارته؟
فى كتاب قدرته؟
فى مشوار روحته؟
مين ح يجى معايا اما اتخرج؟
مين ح يغازل صورى وهو بيتفرج؟
مين وانا فى وظيفتى بتدرج
ح يكون فخور بيا؟
مين ح يلبسنى طرحتى؟
مين ح يفرح اكتر من فرحتى؟
مين ح يزغرط ليا؟
والنبى يا أمى قوليلى
ح الاقيكى فى وش مين
لما ادور عليكى؟
..............
قولتلها
ح تلاقينى فى لطف ربك
ح تشوفينى ف وش خالتك
ح تلاقينى فى عيون صحبتى
اللى كانت بتحبنى
ح تحسينى فى حضن ابوكى
ح تلاقينى جنب اخوكى
مع ناس كتير بيحبوكى
بقولك ايه ؟ما تفكريش
انا دلوقتى معاكى بعيش
استغلى الوقت ما تنشغليش
يمكن ما مشيش
الا لما منى تشبعى
لو ان من حضن الام ما بتشبعيش
Post A Comment: