خدعوك فقالوا الزئبق الأحمر يعالج كورونا
بقلم د. شريف شعبان
بمناسبة البحث عن علاج لمرض كورونا COVID-19
تعرف ان السر في الزئبق الأحمر؟!
ناس كتير عندها اعتقاد دفين ان مادة الزئبق الأحمر مادة سحرية ليها القدرة على علاج كل الامراض المزمنة والطارئة، وفي منهم بدأ يدور عليه علشان يعالج الكورونا. وقبل كده كان عائلات بتدور على الزئبق الأحمر علشان تحضر بيه الجن والعفاريت علشان يساعدوهم في استحضار الملايين من الدولارات والجنيهات، وفي المقابل بيدفعوا فيه الملايين للدجالين.
اعتقد الناس إن المادة دي موجودة في مومياوات ملوك وكهنة مصر القديمة اللي حطوها جوة كبسولة على شكل بلحة أو تمرة في رقبة المومياوات، وده خلى ناس كتير تدور على المومياوات بشكل غير قانوني ويدمروها علشان يلاقوا البلحة الوهمية دي.
مش كده وبس، ناس كتير ربطوه بعلم الخيمياء وحجر الفلاسفة السحري وفكرة تحويل التراب لدهب.
وفي الحقيقة المادة دي مادة كيميائية حقيقية بتدخل في صناعة بعض أجهزة المعامل الطبية وأجهزة الترمومتر وقياس الضغط والمفاعلات النووية، يعني ملهاش اي علاقة بمصر القديمة ولا السحر ولا الشعوذة.
أوعى حد يضحك عليك ويقولك الزئبق الأحمر بيعالج الكورونا، أو بيعالج أي مرض!!
Post A Comment: