د. محمد مشالي طبيب الغلابة.من سلسلة (أبطال منسيون) بقلم د. شريف شعبان

د. محمد مشالي طبيب الغلابة

 من سلسلة (أبطال منسيون)  بقلم د. شريف شعبان 

واحد من أعلام مدينة طنطا اللي عايشين في الظل والأعلام بعيد عنه رغم عبقريته وانسانيته الكبيرة.

مارس الدكتور مشالي مهنة الطب لأكتر من 50 سنة، ووهب حياته لخدمة المرضى من أهل بلده طنطا والناس بتجيله من آخر الدنيا. شهرة وبراعة الدكتور مشالي مش في شطارته وسمعته وبس، وكمان لإنه الطبيب الوحيد في مصر إن لم يكن في العالم اللي اجر كشفه ثابت من 50 سنة وهو 10 جنيه وروشتة العلاج لا تتعدى 70 جنيه. كل يوم ولحد دلوقتي الدكتور مشالي اللي عره يتخطى 75 سنة بياخدها مشي من بيته لمسافة 5 كيلومترات لحد عيادته الحالية قرب ساحة المسجد الأحمدي في طنطا، وبيقف على باب عيادته العشرات بل والمئات من المرضى. 

اتخرج الدكتور مشالي من كلية طب القصر العيني عام 1967 فى تخصص أمراض الباطنة العامة والسمنة وبدأ رحلته بعد التخرج والتكليف وفتح عيادتين صغيرتين بقريته "محلة روح" و"شبشير الحصة" مركز طنطا قبل افتتاح عيادته الصغيرة في ميدان السيد البدوي.

من فترة برنامج "فإطمن قلبي" صوّر معاه وعرض عليه إنه يجددله عيادته أو ياخد مقابل مادي محترم، إلا إنه رفض وقال جملة حلوة "أنا فقير وحاسس بالفقرا وأبويا الله يرحمه وصانى خير بيهم"، وطلب من مقدم البرنامج إنه يوجه تبرعه للمستشفيات والجمعيات المحتاجة، في حين إنه مسخر عيادته للتقرب من الله. 

ورغم بسطاته وهده، إلا إن في ناس بتشكك في مصداقيته وبتعتبر إنه متأخر عن الركب الطبي، ومع ذلك شهادات أهل طنطا تشهد ببراعته وشطارته.

الدكتور محمد مشالي مش بطل حرب ولا زعيم سياسي ولا طبيب مشهور بيلم تبرعات بالملايين لتجديد مستشفى أو مشروع، حياته بسيطة لكنه أثر في حياتة الآلاف اللي اداهم أمل في الحياة وخفف عنهم الألم.