جوه منى..
بقلم الشاعر محمود الراوي
جوه منى
حبة مشاعر متلغبطين
وجنون يجيني
واعيشه حبة
ولما عقلى من تاني يرجع
أقول لنفسي أنا كنت فين
جوه منى حبة مشاهد
وحكايات ف قلب حكاية واحدة
عنونها أنا
فمتستغربوش ان الفصول
متفرقة مع انها
ف رواية واحدة متجمعين
أوقات بتحضن وشي فرحة
وانا جوه عيني دمعتين
واوقات أكون مبسوط معاكم
وإحساسي من جواه حزين
وممكن أضحك بعلو صوتي
وبعد ضحكي تشوف عيونكم
شيء من آلامي
وأهاتي تصرخ صرختين
جوه منى حاجات كتيرة
لكنهم متبعترين
أوقات بكون مش عارفني
فما تسألوش أنت مين
إنسان بيصدق ويا نفسه
مع انه عايش بين كدابين
ولا إنى كدبة ولسه عايشه
ف وسط ناس طيبين
جوايه ألف معنى غايب
عن حياتنا من سنين
جوايا حب غرقان ف دمه
ميت ما بين شوقي وحنين
لحب مش عايش ف زمني
عشان سبقته بخطوتين
جوه منى شاعر بيكتب
ما بين كلامكم كلمتين
يمكن يهون عل نفسه جرحه
إكمنه فضفض حبتين
Post A Comment: