قصيدة بعنوان (جندي سينا) شعر علي حمدي أبوخوات شاعر من مصر

الرصاص في سينا لسه

فاكر ضربه م الجنود ...

اللي ماتوا في الجهاد

واتعطروا بالبارود ...

لما انحنى العدا ليهم 

من أثر المطاردة...

وخلوا النصر ريحته فاضلة

من سنين للنهارده ...

ولتاريخهم دا بندرس 

اللي زرعوا وطننا نرجس ... 

وللوحدة علمونا 

وعرفونا 

إن طه زي جرجس ...

وعرفونا إن الجندي 

دمه أغلى من أفندي ...

وإن المصري لما يغضب 

بيطير بدون جناح...

ويصد جيش لوحده

وبطوله بدون سلاح ...

والكفاح في دمه جاري

وساعي دايما للشهادة ...

حب وطنه شئ مقدس 

حب يشبه للعبادة ...

صوته واهبه للهتاف 

وتاجه سلاح على الكتاف ...

اللي ماشافش جندي مصري 

يبقى عمره في يوم ما شاف ...