الشاعرة المصرية منال شاهين تكتب قصيدة بعنوان "روبابيكيا"

فَتّح كل السراديب

لِم وطَلّع الكراكيب

أي حاجة بيكيا

جَرح ولاحَبة مكاتيب

آخُد حاجات قديمة

وكمان مُسٔتعملة

جُروح ولاّ أوجاع

  ولِسة مِسَمّعة

 أي حاجة حتى

لو ملهاش قيمة

بشوية صبر 

هتبان مِلمّعة

قلوب لو مش رحيمة

ومن جواها مِخلّعة

نِسْيت الرحمة

والاسوة فيها مِزرّعَة

نفوس لساها لئيمة

أو عيون مِدَمّعة

ودموعها عزيزة

اهِي عيوب مِجَمّعة

هَنقَلِب فيها!!

على حِتة سليمة

ولا على ضِحكة 

وِسط كوم دموع

 تبقى زي ضلمة 

تِئيد فيها شموع

ولا يمكن نِتْعَتَر

في إيدين كانت كريمة

لا استنت تِتْشَكر

وجار عليها الزمن

صبرت وكانت حليمة

وباعت من غير تمن

يلا لو عندك نِية

هَنعِندلك لِمِية

التقيل عليك

 يمكن لغيرك هِدية

لِمْ وزَوِدْ وهات

يمكن نلاقي

اللي يداوي الآهات

  أو نقدر نِصَلّح

ولا نجبر خاطر 

قلب كان مِجَرّح

 أو نراضي قلوب

صَبرتْ كما أيوب

نعلمها تبقى حكيمة

 تفيد وتستفيد

بكل حاجة قديمة

وملهاش عندك قيمة

المِكَسٌرة بعـنينك

لـِـغيرك سليمة

بيكيا