- مالك يا اسلام شارد من الصبح كدا ليه ومش مركز في حاجه خالص!!
= البنت يا أحمد زي القمر لونها يحير حاجه كدا بسكويت تتاكل أكل أول ما شوفت عينيها حسيت اني سافرت لعالم تاني صورتها مش بتروح من بالي أبداً...
- اسمها ايه طيب؟ شوفتها فين؟ اي حاجه عنها لما نشوف اللي جننتك من اول نظره دي!!
= معرفش عنها اي حاجه لا اسم ولا سن ولا عنوان ولا اى حاجه...
- نعم!! عامل كل دا علي شخصيه مجهوله، بقولك اى يا اسلام أبعد عني انا مش ناقص سهوكه مسخه الله يسترك..
= هشششش سبني سرحان فيها شويه..
ـــــــــــــــــــــــــــــــــــــــــــــــــــــــــــــــ
- ها يا مريم رتبتي نفسك، خلاص هتمشي وتسبيني بعد ما اتعودت انك معايا..
= لازم استقل لوحدي مش هفضل قاعده معاكِ طول العمر يعني يا دعاء
- ماشي ي ست، المهم اني ورايا مشاوير كتير النهارده تيجي معايا؟
= اجي معنديش مشكله بس....بس انا معرفش اي حاجه هنا ولا اى شارع حتي..
- يا ستي أنا معاكِ و هعرفك كل الشوارع، أنتِ مفكره نفسك ماشيه مع عيله صغيره!
= خلاص مفيش مشكله شويه ونجهز ونروح في المكان اللي أنتِ عيزاه..
ــــــــــــــــــــــــــــــــــــــ
* بعد ساعه نزلنا و لفينا كل شوارع اسكندريه و دعاء مش عاجبها حاجه وطلعت عيني...ولسه داخلين ع المحل العشر تلاف...لفت نظري فستان ووقفت اتفرج عليه..
- أحمد: أووووبا بص يا اسلام البنت اللي هناك دي ولا تقولي بقي الشخصيه مجهولة المصدر ولا بتنجان..
اسلام= فين دي؟.... هي دي البنت اللي بقولك عليها شوفت بقي قمر ازاى كان عندي حق لما أتوهمت بيها ولا لأ؟
- أحمد: لأ هي حلوه الصراحه و البنت اللي معاها احلي و احلي ( بضحكه شريره) خلاص خد انت دي و انا هاخد ام حجاب اااه...أصلي راجل حُر مأحبش مراتي تكون من غير حجاب كدا..
اسلام= بس بس أتلهي، هو انا عارف أوصلها الاول علشان افكر في الحجاب ولا غيره.!
- أحمد: طب واللي يخليك توصلها؟
اسلام= أديله عيني
- أحمد: لااا يا باشا و انا هعمل اى بعنيك عندي منهم اتنين.
اسلام= خلاص يا عم أديك عُمري و عُمر فوق عُمري كمان..
- أحمد: لا بقولك اى فكك من الشغل دا، انا عايز حاجه ملموسه اه متقوليش عمري وعيني ورجلي..
اسلام= يا عم اللي أنتَ عايزه أنجز بقى
-أحمد: خلاص متزعقش كدا، شوفني بقي واتفرج هعمل اي
ـــــــــــــــــــــــــــــــــــــــــــــــــــــــــ
- أحمد: لو سمحتي يا آنسه...
= مريم.. اسمي مريم
- أحمد: لو سمحتي يا آنسه مريم ممكن تقوليلي مول *** موجود فين؟
= للأسف أنا معرفش أي حاجه هنا ثواني أسأل دعاء
دعااء... دعااااااء
دعاء: نعم يا مريم؟!
= مول*** دا موجود فين؟
دعاء: ليييه؟
= الأستاذ دا بيسأل عليه
دعاء بصوت منخفض: مريم أنتِ اي حد يكلمك كدا تردي!!
* احمد في سره ( اسمها دعاء كمان يا وعدي يا وعدي انها لفتاة جميله)
= دا شخص محتاج مساعده عادي حبيت اساعده
دعاء بعصبيه: موجود عندك يا أستاذ في تاني شارع علي اليمين
* أحمد متنح
دعاء: يا أستاذ؟!
أحمد: ايوا ايوا، شكراً جداً ليكم..
دعاء: العفو
ــــــــــــــــــــــــــــــــــــــــــــــــــــــــــــ
دعاء: مريم أنتِ لازم تكوني حريصه شويه لأن في كتير بيجوا يرخموا علي البنات، وبعدين المول دا مشهور جداً وأي حد عارفه بس هو بيستعبط..
بضحك =أما عليكم حاجات تجن..
دعاء: إحكيلي بقي أنتِ أزاى بتتكلمي عربي و مصري حلو كدا، دا أحسن من المصري بتاعي كمان.
بضحك=والدي كان دايمًا بيتكلم مصري ويديني كورسات لغة عربية كتيير وأنا كمان كنت ميالة للعرب.
دعاء بضحك: بعد ميالة دى خلاص أنتِ كده مصرية و أصيلة كمان ، يلا بينا نروح بقى.
ـــــــــــــــــــــــــــــــــــــــــــــــــــــــــــــــ
أحمد: أبسط يا عم طلع أسمها مريم
=اللهم صلّ على النبي، ها عندها كام سنة.
احمد: كام سنة اي أنتَ أحمِد ربنا إني عرفت أسمها، البنت التانية دى شرسة اوي بس أي قمر وشخصية.
=يا أحمد سيبك من التانية دى دلوقت خلينا في مريم
أحمد: بص يسطا انا حطيتك علي أول الطريق وانتَ أجتهد بقى
= بقاااا كدا!.
أحمد: اه كدا يا اسلام.
إسلام بتوعد: جايلك يوم يا باشا..
أحمد: لا انا هجتهد مش زيك.. هأ
ـــــــــــــــــــــــــــــــــــــــــــــــ
* روحت البيت بعد ساعه لقيت مسدج تيلجرام، الاشعار كان من ساعه يعني وقت ما كنا بنشترى، فتحتها..
* مين اسلام؟!!
- أنتِ أزاى جالك قلب تعملي فيا كدا؟
* فضولي قتلني أعرف انا عملت اى ومين دا أصلاً!!
= مين حضرتك؟ وعملت فيك اى؟
*في نفس الثانيه رد عليا و كأنه بايت في الشات
- أنا اسلام، و مش هلف و ادور كتير لاني مش من عادتي كدا، انا كنت موجود في مكان انتِ كنتِ فيه النهارده و من اول ما شوفتك اتهبلت
= ااه وانا عملت فيك ايه، واكيد بدون قصد..!
- خطفتيني مش عارف اطلعك من دماغي..
* وقتها الكلام مش هنكر انه لمس قلبي وكنت بغيب في الرد..
= لو سمحت انا مش فاضيه للكلام الفارغ دا..
* الكارثه ان اسمه اسلام، بدون تفكير عملت بلوك.. نمت والتفكير هيقتلني بس الموضوع مينفعش فيه التفكير اصلاً..
ـــــــــــــــــــــــــــــــــــــــــــــــــــــــــــــــ
اسلام: بقولك يا أحمد هو لما تكون بتكلم حد وفجأه الصوره تختفي دا يبقى اى؟
أحمد بضحك= يبقى بلوك يا ناصح
اسلام: بلوك!! من اول مره كدا..
أحمد= روح نام يا اسلام وبكرا نبقي نشوف أنتَ هببت أى
اسلام بحزن: ماشي يا احمد...
ــــــــــــــــــــــــــــــــــــــــــــــــــــ
* عدا كام يوم علي اليوم دا...
* فون اسلام رن
- الو..ايوا يا أحمد!!
= يسطا عايز أقولك علي حاجه، انا كلمت دعاء وقولتلها اني حبيتها و طلعنا قرايب كمان وهكلم والدها قريب..
- اه و المفروض اتنطط من الفرحه يعني ولا اعمل اي..
= أرى الحقد في عينيك يا صديقي أراه، وبعدين المفروض تفرح كدا هقدر افتح معاها موضوعك أنتَ و مريم..
بفرح - حبيبي يا أحمد هي دي الصحوبيه..
بضحك = عد الجمايل بقى..
ــــــــــــــــــــــــــــــــــــــــــــــــــــ
* بدأ احمد يفتح الموضوع مع دعاء..
- أزيك يا دعاء؟
= الحمدلله بخير، وأنتَ
- كويس الحمدلله، بقولك يا دوو هي صاحبتك دي غريبه كدا ليه؟
= مين مريم.. هي بس مش متعوده على جو مصر، زي ما أنتَ عارف برا مصر غير عندنا.
- أيدا هي مش مصريه كمان!!
= اه، والدها بس هو اللي مصري بس هما عايشين برا مصر
- يا بختك يا اسلام طلعت مش مصريه كمان
= ليه هو ماله اسلام؟
* في الوقت دا اسلام بعت مسدج لأحمد انه خلاص هيتشجع ويعترف لمريم بحبه وجهاً لوجه
- تصوري أنه كمان بعت مسدج انه خلاص هيعترفلها
= ماله اسلام، و هيعترف لمين بـ أي
- انه بيحبها
= بيحب مين؟
- مريم!!
= لااااااااء بيحب اى، مينفعش يا ابني..
- هو اي اللي مينفعش ليه تقطيع الارزاق دا
= انا مش بهزر يا أحمد بجد مينفعش
- يا ست واي اللي يقل نفعه
= مريم مسيحيه
- اوو شت، اي الحظ دا... أما الحقه بسرعه قبل ما يقولها حاجه، هكلمك تاني يا دعاء
* رد بقى يا اسلام ودا وقته
- الو.. بقولك يا دعاء اسلام مش بيرد أنتِ تعرفي هي ممكن تكون فين دلوقت
= اه هي كانت بتقول انها متقاعد في كافيه قريب من البيت
- طيب كويس انا جاي اخدك ونروح نلحقه قبل ما يتكلم
= تمام مستنياك
ـــــــــــــــــــــــــــــــــــــــــــــــــــــــــــــــ
* في الكافيه...
اسلام: أزيك يا مريم..
مريم= حضرتك مين؟
اسلام: انا اسلام، اللي رزعتيه بلوك
مريم = هو أنتَ بقى..!
اسلام بضحك: اه انا اللي عملتي فيه كدا
مريم = و حضرتك عايز ايه يا استاذ اسلام..!
اسلام: عايز اقولك اني حب......
* وهنا أحمد جه في الوقت اللي بعد المناسب بشويه
اللي هو الوقت الضايع
أحمد: اي دا اسلام هنا اهو يا دعاء ومريم كمان، طب تعالي يا ابو الصحاب اقولك ع موضوع كدا
دعاء: مش يا مريم خلاص خطوبتي انا وأحمد هتكون كمان أسبوع..
مريم= بجاااد مبروك يا حبيبتي
ــــــــــــــــــــ
أحمد ل اسلام: كويس أني جيت فديالوقت المناسب، دا انت حظ حاجه استغفر الله
اسلام= ليه بتقول كدا؟
أحمد: مسيحيه...البنت مسيحيه يا اسلام
اسلام بضحك علي صدمه علي كوكتيل غريب من ردة الفعل= بتهزر يا احمد صح..!
أحمد: لا يأخويا مش بهزر دي حقيقه...يا نحس
«««««««»»»»»»»»»»»»»»»»»»
- مسيحيه يا اسلام حته واحده
= شوفتي يا وعد الحظ
- صعبت عليا اوي
= خزان احزان
- بس علي فكره كان ينفع تتجوزوا عادي يعني
= عارف، بس فيها مخاطره ومغامرات كتير و دا كله وهي ممكن تكون مش بتحبني اصلاً ممكن اى دا اكيد
- كنت غامر.. ما الغاوي بيغامر
= الغاوي بقى..
وبعدين كفايه أحمد اتجوز دعاء اهو حد فينا استفاد
ومنهم ومن فرحتهم قابلت فرحتي و وعدي و مكتوبي اللي عوضني عن اللي فات..
- فعلاً رب الخير لا يأتي إلا بالخير، يارب بس تكون نسيتها و متكونش لسه بتحبها ... هه
= بالله حد يفكر في حد تاني وهو معاه انسانه زيك..!
- (بغرور) مثلاً يعني
= اتغر يا جميل مهو ليك حق.
- المهم يا اسلام احكيلي عن ذكرياتك القمر دي
= بكرا يا وعدي نكمل حكايتنا
Post A Comment: