الشاعرة المصرية منال شاهين تكتب قصيدة بعنوان "حفلة تنكريّة"

الحياه حفلة تنكرية..

وشوش ولابسة أقنعة

بس النفوس هي هي..

تهرب لحظات مُمْتِعة

وتعيش بأدوار خياليّة

نِـتفِـق أو نِخْـتِلِف

نخبى ولا نِـعْـترِف

إننا بنعيش بحفلة تنكرية

دا لابس وش فارس

هو فين زمن الفروسية؟

واللي عاملة نفسها أميرة

وعايشة في رومانسية

ودي هانم ف توب فلاحة

بتجرب عيشة طبعيّية

واللي لابسة باروكة ملونة

والشياكة عندها أولويّة

حتى لو شياكة كلها غش

وعيون مسجونة ورا قناع

 تخليك بألف ألف وش

وشوش ولابسة أقنعة

تحسِسَك إنها مقنعة

حفلة ووقتها بينتهي

وكل الوشوش بتختفي

كل واحد لابس قِناع

والأصل فيها خِدَاع

اللي يبان انه شاري

يطلع في الاخر بياع

وكأننا  في تمثلية 

وتحت القناع الف قناع

ودي حقيقة حياتنا

 مش قصيدة شعرية