الشاعرة المصرية رندا محمود تكتب قصيدة بعنوان "حروف"

بصمت على قلبى بحروفي

طلعت حروف لا متشكلة

 و لا منقوطة

حاجات متكعبلة منحوتة

متغربلة محطوطة بالعكس

ما تعرفها لغات حية ولا ميتة

مالهاش معنى ممطوطة

مش عارفة اعبر ع اللى جوايا

دي حروف متفبركة متفشكلة

كأنها رموز ف قلب مخطوطة

ما أعرف زعلانة و لا مسامحة

 و لا مخضوضة

ما اعرف الحدوتة اللى جوايا

حلوة ولا ملتوتة

ما هى فى الآخر حدوتة

خلتني هادية و لا متظربنة

مالتنى بتعابير مش مفهومة

عايزة أقول لساني يتلوي

ما يطلعش غير همهمة

متعجلة متحكمة

بقيت شكا ان انا اتعلمت

الكلام اصلا و انا صغنطوطة

انا من البلد دي ولا من بلد بدائي

من مكان بعيد و نائي

بيتعامل بشكل عدائي

هو العالم اللى مش فاهمني

ولا انا اللى مش فهماه

اكونش كائن فضائي

ولا انسان استثنائي

جايا فى وقت مش قصداه

ولا لسه ما جتش اصلا

ولا عايشة سعيدة فى غبائى