عيش وملح....
هو اللي بينا ايه ؟
مكنش عيش وملح؟
ولاضحكة وراها جرح!
ولا اللي بينا حاجة صعبة
ومحتاجة لألف شرح؟
ولا زرعتنا مُرة؟
وأما جينا نحصدها
ما لقينا في ايدنا طرح؟
مكنش عيش وملح؟.......
ياللي خَبّيتُوا الكِبر جُواكُم
والضِحك عالوشوش
الغِل في القلب خَلاكُم
تِجْرُوا زي الوحُوش
كُـتر الأسَى قَواكُم
بِتدوسوا ومترحموش
هو مكنش عيش وملح؟
قالوا اللُـقا نصيب
ومِسير الحي يتقابل
اللي عَامل نفسه حبيب
يلَا م الوجع يقَابِل
الايام راحة و جاية
وهنبقى مية مية
اللي حابب يمشي ويسيبنا
يلا ألفين سلامة وتحية
يبقى أصلا مش نصيبنا
مكنش عيش وملح؟.......
قَلبي خلاص خدكُم غِياب
مش هيعمل لقلوبكم حِساب
اللي باعني واللي خان
واللي وقت جرحي غاب
لازم هيدوق العذاب
مكنش عيش وملح؟.......
علي جرحي بهنيكم
ومن قلبي بـهْدِيكم
ألف وِسام للـبِـعاد
السنين اللي عشتها ليكم
هبعيها ولا هشتريكم
حتى مش هَـنزِلها بمزاد
أصله مكنش عيش وملح؟.
يلا أهِي ايام وعدت
وناس بالشدة ظهرت
واللي معملش حساب
ليوم كنا فيه أحباب
ولاصان عيش وملح
ميستناش مني مدح
واللي خسرني هبيعه
ومش هستنى ربح
اللي لسة بينا يدوب
بواقي عيش وألف جرح
Post A Comment: