عارف لما تكون
تايه تتلفت حوليك
على شيء تايه منك
هو ايه ؟
مانتش عارف.
عارف لما تكون
بتدور على معنى لبكرة
وانت مش عارف
ايه وليه كان امبارح.
عارف لما تبص
وراك بجهل وحسرة
وتبص لبكرة ببلادة
امس...يعنى ايه بكرة
ويعنى ايه امبارح
يعنى ايه الموت
والحياة
والنجاح والفشل
يعنى ايه( من غير تزويق) يعنى ايه حياة.
لما تبص حوليك
على مشوارك ستين سنة
تضحك على كل العرق
والكفاح والصراع
والخيبة والنجاح.
على كل اللى راح
وعلى كل اللى جاى
لعبة سخيفة
ومعركة دون كيشوت
طواحين هوا
ولا اى قيمة
ولا اى معنى
جريت السنين
لا عرفنا ليه واذاى
شيلنا الهم بغباء
كان الشرف والرجولة تاج...ما يوم خونا
ولا يوم اتنازلنا
الف مرة انهزمنا
ولكن بقينا مسنودين
على الجدار.
وراحت الايام
وراحت صحاب
واهل وجيران .
راحت الدنيا
واحنا بنعد الأسماء
مين دوره جاى
ومين عليه النداء.
Post A Comment: