من شاهد فيلم شفيقة و متولى لابد أنه استمع لأغنية ( بانو بانو ) من كلمات الشاعر الراحل ( صلاح جاهين ) و أداء الفنانة سعاد حسنى و قد وظفت الأغنية كأنها تأتى فى سياق الفيلم لتواكب أحداثه و بالرغم إنها كانت منسجمة مع أحداث الفيلم و لكن فى الواقع هذه الأغنية كتبت خصيصاً لسعاد حسنى و بناء على طلبها من صلاح جاهين و تروى ذلك السيدة قرينته فى ( كتاب حياة صلاح جاهين بقلم زوجته مني قطان)
رن هاتف المنزل الساعة الخامسة عصرا...
الو..... صوت حزين هادئ صامت حاد مرتجف
مني قطان : الو يا سوسو (كما تحب سعاد حسني ان يلقبها المقربين) عاملة ايه!؟
سعاد : كويسة ممكن تبلغي استاذ صلاح اني هجيله الساعة ٣ الفجر عاوزاه في كذا حاجة كده... واغلقت المكالمة في صمت و غموض .
اصبحت الساعة الرابعة و النصف فجرا دق جرس الباب واذا بها سعاد كما لا يعرفها الجمهور بدون مساحيق تجميل او بواريك للشعر او ابتسامة .
جلست في صمت لمده عشر دقائق حتي توجهت بالكلام ل صلاح جاهين
(صلاح .. انت عارف كل اللي وجعوني و اذوني في حياتي وعارف مين باعني و مين استغلني و انا قلبي اتحرق من مين .. انا عاوزه منك كلمات ادي بيها كل اللى تعبونى بالقلم .. عاوزه اعرفهم انهم ولا حاجة يعني عاوزة اغنية لسعاد الغبية الهبلة اللي صدقتهم .. انا مش هطول .. انا بس كنت مخنوقة وحابة اصرخ في اغنية)
غادرت سعاد المنزل سريعا و امسك صلاح جاهين بقلمه ليعبر عن مشاعر سعاد و صرختها فى وجه ظالميها .. وبعد يومين فقط خرجت اغنية( بانو بانو ) ..من الحان الموسيقار / كمال الطويل
و اليكم كلمات الأغنية :
بانو بانو بانو.. على اصلكو بانو
والساهى يبطل سهيانه
ولا غنى ولا صيت.. دولا جنس غويط
وكتاب ما يبان من عنوانه
بانو.. أيوه بانو
***
جربنا الحلو المتعايق ابو دم خفيف
وبقينا معاه اخوة شقايق فاكرينه شريف
اتاريه مش كدة على طول الخط
الطبع الردى من جواه نط
خلاص بقى مهما انشال وانحط ..
مافيش دمعة حزن عشانه
بانو .. ايوه بانو
***
وعرفنا سيد الرجاله
غرفنا عين الاعيان
من بره شهامة واصالة تشوفه تقول اعظم انسان
انما من جوه يا عينى عليه
بياع ويبيع حتى والديه
واهو ده اللى اتعلمناه على ايديه
القهر وقوه غليانه
بانو .. ايوه بانو
***
دوروا وشكوا عني شوية كفاياني وشوش
دا أكم من وش غدر بيا ولا ينكسفوش
وعصير العنب العنابي
نقطة ورا نقطة يا عذابي
يكشف لى حبايبى واصحابى
يوحدنى وانا ف عز شبابى
القلب على الحب يشابي
والحب بعيد عن أوطانه
بانو أيوه بانو
بانو بانو بانو
على أصلكو بانو
أهو كده بانو
على أصلكو بانو
Post A Comment: