سألتني بنتي انا ايه بالنسبة لك؟
فكرت وسرحت شوية سألتني مالك؟
قلتلها انتي الملكة لكل الممالك
انتي بطلة كل المعارك
انتي دربي اللى سالك
انتي فى قلبي ملايكتي اللي محوطني
انتي الادين اللى ساندني وحضنيني
انتي تحويشة عمري
شوية الحب اللى مأمنيني
انتي اللي مخلياني مش هاممني
اكبر اشيب مش شايفة فيها اي عيب
عيونك مجمليني
عارفة لما بقوم من سريري الصبحية؟
بعرف انك مستنية
الحضن اللى بدهولك وانا معدية
بيبقى ليومي اهمية
يوم ولادتك كنت انتي الهدية
وادتيني هدية
خلتيني اعيش معاكى
الحياة من اول و جديد
عشت معاكي الحياة
اللي مكنتش فكراها
اللي انتي فيها محلياها
يعني سننت من تاني
شفت بعيوني الحاجات
اللي كانت وجعاني
اتعلمت المشي ووقعت
بس وقفت معاكي سنداكي
زي ما انتي دلوقتي سنداني
ودخلت معاكي المدرسة
وذاكرت و زهقت
وصرخت بصوت عالي
يا مذاكرة مش حباكي
وعشت معاكي الامتحانات
ولما بتهرب المعلومات
ومخاوفك اللى رعباني و رعباكي
دلوقتي حاسة ان سنك سني
الشقاوة وخفة الدم سكنني
بتريق ع المدرسين معاكي
رجعت تاني اقف قدام المراية ورايى
اصلح الحاجة اللى مش عجباكي
بالاختصار الشديد
فى يوم العيد كنتي انتي العيدية
كنتي انتي التكبير
كنتي ضيوفي الكتير
كنتي المعنى للحياة
امشي في كل اتجاه
لكن عندك انتي اقف انتباة
يا اكبر نعمة من الاله
Post A Comment: