الشاعرة المصرية منال شاهين تكتب قصيدة بعنوان " صحبتي أفتقدك"

معنى الصحاب...

يعني إيه معنى الصُحاب؟

قلب واحد بالوجع يِتْصاب 

يعني ولا يوم نبقى أغراب

ونقدر سوا نعدي الصعاب

يعني ضحكة بوشنا مِتْبَسِمة

ولقمة عيش بينا مِتْقَسِمة

يعني فرحة  تِتِقَسّم علينا

وعِشرة شايلة  الحب لينا 

يعني دموع فرحة  لُقانا

و اللي جوانا تقوله عنينا

يَعْني لـمّا تكون ف ضِيقة

 يبقى جنبك وف دقيقة

يعني اللي وجعك وجَعُه

والهم قبل منك  كَسرُه

يشيل عنك و يواسيك

 ويـهدي الفـرح لييك

 لو زادت عليك هموم

جنبك ولا يتخلى يوم

ياللي إيدي ساندة إيدك

جرحي نبضه ف وريدك

ويوم عيدي هو عيدك

يعني  لاعتاب ولاملام

دا الود فعل مش كلام  

يعني تحويشة عمري وذكرياتي

يعني صورتي في كل مراياتي

يرد غيبتي لما تيجي سيرتي 

يعني يصون سري وحكاياتي 

ياصاحب عمري وطريقي 

يا كلمة حق تبل ريقي

 تفضل العمر رفيقي

وافتخر إنك صديقي