الشاعرة المصرية راندة محمود تكتب قصيدة تحت عنوان "الوعد اذا اتكسر"
الوعد اذا اتكسر
ما بيطلعش صوت
بتحس بالالم
وبهدوء شديد تموت
هو الوعد سهل لو انكسر يعود ؟
الوعد بقى فض مجالس
بقى زائد و ناقص
تحصيل حاصل
ده كان فاصل و نواصل
حاجة عارضة بتتقال
عشان موقف يفوت
مش بيبقى فى نيتى
يكون لى حدود
انى احافظ ع الوعود
ان يكون كلامى عقود
يكون لسانى مربوط
عند كلمتى
مش ح اتحرك من مكانى
الا ووعدى قدامى
محققاه ولو فوق آلامى
ليه يبقى كلمة اتقالت
ليه الوعد يبقى بس كلام
تجارة و شطارة واضغاث احلام
تقول وعدتنى! يقول هات اثبات
اى دليل والسلام
ما تتكلمش فى الاوهام
وتنهار حياة و تتخرب بيوت
عشان وعد ما بقاش موجود
وتبقى آية من آيات النفاق
وعند كل اتفاق
عادى توعد وتخلف
وبرضه عادى تحلف
وادخل فى السباق
والعب بالتلات ورقات
لو مش ح توفي
اوعدنى بالسكات
Post A Comment: