الشاعرة المصرية راندة محمود تكتب قصيدة تحت عنوان "سألت بطن الأرض"
سألت بطن الأرض ليه بتغلي
ليه جواكي حمم وبراكيين
إيه ح تاخدي من غلك ع البني آدمين؟
هزت الأرض هزة وقعتني
دحرجتني بالطول والعرض
بتسأليني؟إنتي أصلا مين؟
إنتي عندى مش من الغاليين
ٱقفى بأدب
أكم جبل بهزة مني واتقلب
اتحملتكم آلاف السنين
غلى بطني و أسود جوفي
خلصت عليكم حروفي
صبري منكم أتغلب
قبل ما تسألوني ف بطني إيه؟
دوروا أنتم على بطنكم
شوفوا سواد قلبكم على بعضكم
سنان القسوة اللى بتعضكم
ع اللي قسيته منكم
وكل الخير اللي اديتهو لكم
رجع لى هباب و طين
طلعتلكم من قلبي زرعى
طلعتلكم من قلبي ميتى
أخدتم من قلبي دهبي و فضتي
ضمتكم بحنية ولين
افتكرتوا إنكم قدرتوا عليا
عملتوا صناعة ورميتوا دخانها ف عنيا
سممتوني وقولتوا سماد
اتاريكم أشر من عاد
خرمتم سقفي و سخنتوني
غيرتم لوني
بعد ما كانت خضرا عيوني
لفني السواد
والحروب اللي بتتقاد
والظلم اللي بينعاد
اقدروا بقى على زلازلي وبراكيني
على كل نوبة غل ح تجيني
ولما تبقوا جواية
اصرخوا وقولوا يا مين دلوقتي ينجيني
على ضهرها كنتم جبروت
معملتوش حساب للموت
وقعت على ركبتي ووشي للأرض
قولت يا ريتني ما كنت سألت
Post A Comment: