الشاعرة المصرية / راندة محمود تكتب "صمتك كلام"
بيحكى حكاية لحد ما أنام
صمتك عيون
بترمش بتدمع بتدور عليا
فين ما أكون
صمتك جنون
بخمن مشاعرك
بتهرب الاعبك
صمتك قاسى
لكنك حنون
صمتك سؤال
سؤال له اجابة
و سؤال محتال
صمتك صبر
و طولة بال
ويمكن مكر
صمتك سطر
وجايز سطور
تكتب حكاوى
وتقول الغناوى
وترسم بحور
وتنهى بنقطة
و...يقف القطر
كل اللى كان
كأنه ما كان
مات الكلام
بنبقى فى نفس المكان
ويدور فى بالنا الف حوار
ويتكلم بدالنا
روحنا و خيالنا
لكن مابينا...الف جدار
مين بناها؟
وأيه علاها
وبدل ما تنهار
خبط فيها الكلام ومات
حق للانسان و فات
والصمت بقى
دستور ...
ديكتاتور...
قانون...
بيفرض عقوبات
نعيش من سكات
صمتك سكتة قلبية
وجنازة معدية
نقف عشانها دقيقة حداد
الشاعرة المصرية / راندة محمود تكتب "صمتك كلام"
Post A Comment: