الأديب المغربي / عبدالواحد مشيشو يكتب قصيدة زجلية تحت عنوان "عثرت الزمان"
الزمن غدار
مابغاني
نكون فحالو
نعيش معاه
او مانتيق بيامو /
الطريق صعيبة
وطويلة
ما فيها لاعوين
لا رفيق ،
مابقيت عارف
العدو من الصديق/
شحال من واحد
طوال لسانو،
نسا حالو أوحال
ولادو /
أش هاد الزمان
الخداع
الراجل بهيبتو
يتباع
ولي ما حضا راسو
حالتو ما تمناع/
كلشي تابع اللعاقة،
السوق مسعور
شاعلة فيه نار ،
خدلوه الفراشة
والشناقة/
مالقينا لا نعجة
ولا ناقة ،
الشايب ما بقى
يحشم
على شيبو ،
بالو مشغول
مع كرشو وجيمو/
أش هاد الوقت
لي حنا فيه اليوم،
الخاوي يتكلم والعامر
مامسوقين ليه /
كيقولوا زمان
مول لمليح
باع أوراح ،
وشحال ما طل الليل
يصباح..
ولي يصفي يبيع
على بكري
ويروح مرتاح....
Post A Comment: