"الشيخ محمد يونس القاضي" شيخ المؤلفين المصريين مؤلف نشيد بلادي
من سلسلة (أبطال منسيون) بقلم د. شريف شعبان
بلادي بلادي لك حبي وفؤادي..
كلنا بنغني النشيد الوطني الحالي، وناس كتير عارفة ان اللي لحنه الشيخ سيد درويش، بس قليل اللي يعرف ان اللي كتب كلماته النارية هو "الشيخ محمد يونس القاضي" شيخ المؤلفين المصريين.
الشيخ يونس تأثر بالزعيم مصطفى كامل وخطبه واستلهم منها نشيد بلادي بلادي اللي اعتمده الملحن الكبير محمد عبد الوهاب سنة 1978 السلام الوطني لمصر، واعتقل 19 مرة بسبب مواقفه السياسية ودعمه للحركة الوطنية وخصوصا لما كانت الناس بتردد كلمات مسرحياته اللي فيها عبارات سياسية ضد الاحتلال.
مش بس كده، الشيخ يونس كتب أغلب الأغاني وكل الطقاطيق بتاعت سيد درويش زي "أهو ده اللي صار" و "زوروني كل سنة مرة" و"أنا هويته وانتهيت"، واللي الناس متعرفوش انه كتب اوبريت بمناسبة اكتشاف مقبرة توت عنخ آمون سنة 1922 كلماتها بتقول "أبويا توت عنخ آمون وبلادى مهد الحرية.." ولحنه الموسيقار محمد القصبجي.
الشيخ يونس القاضي هو اللي اكتشف موهبة ام كلثوم في بدايتها وسافر لقريتها طماى الزهايرة بالمنصورة واقنع والدها الشيخ إبراهيم بالسفر للقاهرة والتحول لغناء القصايد والاغانى العاطفية والوطنية جنب الانشاد الدينى ولكن والدها الشيخ إبراهيم رفض في البداية، وفضل وراه لحد ما كتبلها اغنية من تلحين عبد الوهاب.
الشيخ يونس كان متأثر بشدة بطوفان ثورة 1919 وشخصية سعد باشا زغلول خصوصا لما اشتغل رئيس تحرير جريدة (مصر) السعدية الخاصة بحزب الوفد وكتب أغنية "يا بلح زغلول" كنوع من التورية بسبب منع الاحتلال الانجليزي اي حد يتغنى باسم البطل القومي سعد باشا.
فن وكلمات الشيخ يونس خالد لحد دلوقتي لإنه فن اصيل كله قيم ومعاني.
Post A Comment: