هداية ملاك
من سلسلة (أبطال منسيون) بقلم د. شريف شعبان
بطلة منتخب مصر والعالم في التايكوندو بنت نادي الصيد المصري. بدأت هداية اللعبة وهي 10 سنين مع أخواتها، وانطلقت في رحلة حصد البطولات والميداليات لحد ما اخدت بطولة الجمهورية وهي عندها 14 سنة، وانضمت لمنتخب الناشئين ومنه لمنتخب الكبار.
انجازات هداية في رياضية التايكوندو تتعدى أكثر من 20 ميدالية ما بين دهبية وفضية وبرونزية في بطولات افريقيا والعالم أهمها الميدالية البرونزية في أوليمبياد ريو دي جنيرو 2016 وكانت أول لاعبة مصرية وأفريقية توصل لأوليمبياد ريو. انا فاكر لما لعبت على البرونزية كانت المباراة الساعة 2 الفجر بتوقيت القاهرة، ومصر كلها قعدت تتفرج عليها وتشجعها لحد ما كسبت.
مش كده وبس هداية اتكرمت ضمن ابرز 50 امرأة عربية لسنة 2016 نظراً لصغر سنها وانجازاتها الكبيرة. هداية ملاك رغم عدم تسليط الضوء عليها لإنها مش لاعب كرة قدم إلا إنها عملت اسم كبير ليها ولمصر في سن صغير حيفضل في تاريخها لسنين كتير ولسه قدامها اللي تحققه وتبقى مثل أعلى لكتير من الشباب والشابات، وتقدر ترجع لمصر اسمها في المحافل الدولية وتكمل مسيرة الأبطال الاولمبيين زي خضر التوني وفريد سميكة والسيد نصير.
Post A Comment: