وحلف رغيف العيش
مايدخل في بطن فقير
ولاتحت رجلين الكلاب يترمي
الكلب له..........عضمه
صرخ الصغير وقال ياماه
انا عاوز الضمه.....
انا عاوز ...رغيف العيش واللمه
قالتله...كيف رغيف ......؟!!!!
رغيف كيف.؟!!! .
خد لك لقمه.....
ده رغيف العيش غلي وتغلي
طلع فوق السحاب وتعلي...
قال الكبير ...ازرعوا غله
ازرع الغله..لأجل ماتشبع ....لاجل ماتنفع
لأجل ماتتعلي... وساعتها تطول رغيف العيش
ياولد. اوعاك تسيب البلد
وتاخدك الغربه....
دي الغربه مهما كانت
اصلها غربه.....
في الغربه هتبك الدم كام بكه
هتقعد تحك في جلدك
حكه ورا حكه
هتنسي دبيح العيد والكعكه
هتنسي حكاوينا علي الدكه
والهم لم يتلم دي اتلمت الضحكه
ياولدي ارضك بتناديك...
وصوت الديك بيفكرك بالفجر
قوم صلي كام ركعه.....
وازرع.......
ازرع حلايب واختها شلاتين
سلملي علي جرجس واخوك حسين
بوسهم لي علي الخدين..وعلي اليدين
قول لهم منورين منورين منورين
بوس لي تراب البلد..هات لي كمان كفين
دي مصر طاهره وناسها. طيبين
زارعين جناين الفل والياسمين
زارعين سنابل قمح علي الجانبين
زارعين كروم العنب حاضنه فروع التين
وانت كمان ازرع لنا توشكي
لاتشكي. ولا تتشكي
لاتبكي..............ولاتتبكي
ولاتاخدك الغربه...
دي الغربه مهما كانت ...
اصلها غربه وانت فيها غريب
ازرع حبيبي ...وفرح اولادي
كل الاماكن في الصحراء والوادي
اصرخ بصوت موزون وغير عادي
مصر مخازن يوسف من اجدادي
مخازننا مليانه....وبنهادي
مصر عزيزه.........وجوها هادي
ياولد..........
عاوز تسيب البلد؟!!!!!!!!!!!
اوعاك تكون راضي
وتهون عليك دفنتي.....يدفنوني اغراب
من فين تلاقي ياولد.....في الغربه دي اصحاب؟!!!!!
وتاخدك الغربه.....
دي الغربه مهما كانت اصلها غربه
وانت فيها غريب
Post A Comment: