(فن التعامل مع الجنس اللطيف) بقلم الإعلامية منه عبد الحميد

اتربيت على إني محترمش الراجل اللي بيقلل من قيمة أي كائن انثوي فحياته..اتربيت على إن أي راجل يقلل من أي بنت فالدنيا مهما كانت إيه ميبقاش راجل. 

-فمره كنت قاعده فمكان عام وواحد ومراته وصحابهم قاعدين جروب عالتربيزه اللي جمبي ولاحظت ان كل مامراته تتكلم يتريق عليها ويقلل من كلامها ويضحكهم عليها زي جو التحفيل بتاع اليومين دول بس باسلوب فيه تنّمر قذر لحد ما فالآخر خالص بصتله بصمت وابتسامة قرف ومسكت دموعها واستأذنت ودخلت التويلت وطبعا مش محتاجين نخمن حالتها.. المفاجأه بقى ان صحابه وصحابها اللي كانوا بيجاملوه بالكلام ويضحكوا وبينهم وبين نفسهم مستحقرينه هزأوه بمعنى الكلمه ومن ضمنهم واحده لفتت نظري بكلمة "نزلت من نظري" ، للأسف لضيق عقل وجهل الكائن دا مكنش مدرك انه كده بيهزأ نفسه هو وبيقلل من نفسه ومن كرامته ومكانته هو لإن شئ أساسي ان كرامتها ومكانتها وخصوصآ قدام الناس وصحابهم وأهلهم والدنيا كلها من كرامته ومكانته وعزته هو لإنهم جزء لا يتجزأ عن بعض وكان طبيعي إنه يسقط من نظرهم كلهم ومن نظرها هي أولهم والأكيد إنها مش هتقدر تحترمه تاني.

-وطبعآ مش هتكلم عن الكائن اللي كلنا بنشوفه فأي شارع ونادي وكافيه وجامعه و...... اللي بيمشي يتكلم ويزعق فالموبايل ويتظاهر انه بيزعق لواحده ومش طايق نفسه وفاكر انه كده برنس ومبسوط مالناس اللي بتتفرج عليه كإنه چون سينا .. بشفق عليه انه مش واخد باله من نظرات وكلام الناس بينها وبين نفسها إنه شخص مريض ومقرف.

-رجولتك وجاذبيتك مش هتزيد لما تبين للناس إن حياتكوا فيها زعيق وخناق وإرهاق وانك مخنوق منها وهي ياغُلبك ماسكه فيك ؛ هي لحظة مسكتها فيك دي فهي عشان شايفاك راجلها لآخر لحظه قبل ماتسقط من نظرها.

-رجولتك هتكتمل لما تتعامل معاها كبنوتك وملكتك وحياتك كلها وتتنافس معاها إنك هتسعدها اكتر منها وتظهروا فعلا لكل العالم انكوا أسعد كابلز فالعالم من غير تمثيل.

-معظم الكائنات دي بتجيب العيب لأهلها لإن الملكه اللي ربته طبيعي هتعلمه ازاي يتعامل مع ملكه زيها ،فلما يظهر العكس طبيعي بيجيب للملكه دي الكلام وهي أصلآ بريئه منه ومن أفعاله.

#عفوا ..

#عاملها_ملگه_تكونلها_عظيم_الملوك

#احترمها_تحترمك

#خليك_راجل 

#منه_عبد_الحميد