تجربتي الخامسة مع هاروكي موراكامي.. بقلم محمد طارق كاتب من مصر

الرواية دي تجربتي الخامسة مع هاروكي موراكامي، بعد ما انتهيت منها أصابتني نفس الحالة الغريبة اللي بتصيبني بعد ما بخلص اي عمل لهاروكي، حالة من الدهشة والابهار لدرجة اني بقعد بعدها كذا يوم مش عارف اقرا حاجة فتطلع وحشة وتخرجني من حالة الانتشاء اللي بتوصلني ليها كتابات هاروكي. غريب هذا الرجل ازاي بيقدر يعمل من العادي شئ غير عادي من اين له بهذه الموهبة ! كيف له ان يصنع من حكايات بعض الشخصيات العادية اللي بنقابلها يوميا في حياتنا كل هذا السحر والادهاش ! 

في الحقيقة انا بعد ما خلصت الرواية قعدت شوية كده بحاول اكتب عنها ريفيو مفصل زي ما بعمل مع اي رواية ولكن للاسف معرفتش اعمل كده، وده راجع لسببين الاول ان الرواية فيها بعض التركات اللي لو ذكرتها هفسد بيها عليكم قراءة الرواية، والسبب التاني هو كثرة التفاصيل والتشعبات في اعمال هاروكي اللي بتخليني مش عارف اتكلم عن ايه ولا ايه.

عموما الخط الرئيسي للرواية هو مثلث حب بيدور بين ثلاثة شخصيات، شخص يحب صديقته التي كانت تدرس معه في الجامعة، وصديقته هذه لا تشعر ناحيته بشئ لانها مغرمة برئيسة عملها الأربعينية، ورئيسة عملها هذه لا تشعر ناحيتها باي شئ أيضاً، العامل المشترك بين هذه الشخصيات هو الوحدة، ولكن فجاءة تختفي سوماير البطلة الرئيسية للعمل وهي في مهمة عمل مع رئيسة عملها في احدي جزر في اليونان، ومن هنا تبدأ الاحداث التي ستغير مصائر كل هذه الشخصيات الثلاثة. 

الرواية كانت غاية في الإمتاع والجمال، ترجمتها لطيفة ومفيهاش اي مشاكل تذكر، اُسلوب موراكامي بيتغير طوال الرواية من الرواي العليم الي ضمير المتكلم، وده هيلخبطك شوية لو سرحت ومكنتش مركز هتوه في بعض الاجزاء ومش هتعرف مين بيتكلم. الرواية مش كبيرة علي عكس معظم روايات موراكامي هي حوالي 290 صفحة وانتهيت منها في قعدتين يعني في حوالي 3 ساعات.الرواية في المجمل كانت لطيفة وانا استمتعت بها جداً.