سرد بالعامية المصرية بعنوان (شايل همومي) بقلم رزق البرمبالي قاص و كاتب من مصر

 سنين وأنا شايل همومي فوق كتافي

لا قلت أه ولاعرفت غير الوجع

ساكن جوه قلبي الصافي

ماشي جنب الحيط وساعات جواه

تتنهب تتسرق تروح لولاد العم سام وولاد الكلب أو لولاد السخام، مليش غير لحافي

لساني مسجون في حنكي وماشي حافي

رجليٌّ دابوا م التعب قلت أربطهم بحتة قماشة واللي يقولي مالك أقول له بدور على شاشة 

أربط بها رجلي وأشوف فيها الحرامية، وأقول لهم العوافي

أكل يوم عيش حاف وساعات بدقة

وشايف ال سارق وال قاتل بيأكل حقي ومستني مني أديله حتة وازقه زقه، 

ياناس قولوا لهم الكفن ملوش جيوب

ولا جوه القبر هيلاقوا ورود وحبوب

القبر جواه عملك في دنياك 

هتلقاه هناك قاعد بيستناك 

إن كان حلو حيحقق أمانيك 

ويفتح لك في قبرك أبواب وشبابيك

تطل على الجنة إل فيها كل إللي تتمنى

وان كان وحش ياولداه هتصرخ

وتقول الأه بعلو حسك.

من الحر والضيق والظلام، والعذاب يستلمك

وقتها تتمنى ترجع للدنيا تاني

 علشان تعمل الخير ولا شئ يمسك.