فيه روح بتتواصل..
فى الحب لا تفاصل..
وروح لما تروح ..
روحنا تروح فيها..
وروح علينا تطل..
ونفرح لما تهل..
بيضة وزى الفل ..
قلوبنا متشعلقه بيها..
وروح عاوزه تتوب ..
وروح بتبيع قلوب..
وروح بايعه حبايب..
وروح شارية اللى شاريها..
وروح بتتناصح ..
وروح غاوية مصالح...
وروح تلاقيها دايما …
ماشيه ورا روحها...
وناكرة اللى قانيها…
وروح بتتخاصم….
وإن خاصمتك لازم..
لو حتى الغلط منها…
ما تسيبك ولا تسيبها...
عاوزاك بالصلح تبدأ..
و مافيش فى الهجر مبدأ..
وعشان إنت حبيبها..
روح و راضيها...
وروح دايما تنوح...
وروح غاويه جروح...
وروح ماليها لازمة...
عامله فى الدنيا أزمة…
لو يوم حاولت تشاغلك….
لا تنشغل بيها…
وروح لو راحت يروح
كل الدفا والحب..
وروح حابه تبوح..
وروح تشفى الجروح..
تسعد بروحها القلب...
و أرواح كتير جنبيها...
وروح على طول تصد ….
وروح ردودها برد..
وروح بترفض أساسا..
على التفاهة ترد….
ولو قابلت خيابة..
على طول تعديها…
وروح خمره بتسكر..
وروح فى الطعم سكر..
وروح ريحتها عنبر...
وروح طرحتها ورد…
واجب نراعيها….
وروح طباعها الشر...
وروح بتعمل سحر...
وروح بتزرع أمل….
وروح تفك العمل….
لو عين علينا تقر…
يكفينا شر عنيها…….
وروح تقيله وجامده ...
وروح حامده ...وروح جاحده..
مهما تشوف الخير…
يكفى التراب فى عنيها…
وروح زى الإزاز ..
لو بكلمة رميتها …
أو نظرة بس طالتها…
تنكسر فتافيت….
وننجرح بيها…
وروح بسبع ترواح…
أعصابها فى التلاجة..
مايهمهاش الناس..
وما يهمهاش حاجة..
عايشة سلطانة زمانها…
لو بس نبقى مكانها…
هنكون ملوك زييها…..
Post A Comment: