الشاعر المصري / حسن على يكتب زجلًا تحت عنوان "حادى بادى"
حادى بادى كرنب زبادى
بص و شوف اييه الناحية دى
شايف أخ بيكره اخوه
واد مجنون و عبيط معتوه
ياض ده اخوك من غيره تتوه
عايش سندك عايش ضلك
و أنت شيطانك غاوى يضلك
عامى عينيك بسواده و غلك
يا اخى ملعون ساسك ابو راسك
فين عقلك طب فين إحساسك
إن الأخ سند لاخوه
شايف ارض خضارها اتحول
فيها البركة من عامنأول
كان خيرها مادد و مطول
خير بيمد جذوره و عارف
إن الخير للأهل مكمل
لكن الزحف اهو طالها و بارت
بنيان أكل الخضرة و غارت
حتى طيور البرج اهى طارت
و خضار الروح صار يتسول
شايف واحد قلبه نضيف
كل اماله غموس و رغيف
خالى العقل من التزييف
م. التطبيل ويا التحريف
يعرف بس الشتا و الصيف
كسوة بتستر جسم نحيف
عمره ربيع رايح لخريف
عمره ما شاف حتى التكييف
واد فى الطاولة تقول حريف
وقت الحق حدوده السيف
شايف كرش اتملى ملايين
نازل طحن على الفكين
والغلبان بين الضرسين
أهدى شوية يا عجل تخين
طالع واكل نازل واكل
منشار سانن عالجنبين
شايفك يا ام الطرحة التولى
خبى الليل بنجومه و طلى
قلبى اتكلم قالى و قالى
امتى الحلوة دى بس تميللى
و تحلى ايامى تملى
تبقى شمسى ويا ضلى
عاشقك يا ام جبينك نادى
عاشق الصوت من غير ما تنادى
ما انتى امالى و جزئى و كلى
حادى بادى جادى بادى
كل حياتى فى الناحية دى
الشاعر المصري / حسن على يكتب زجلًا تحت عنوان "حادى بادى"
Post A Comment: