الأمان وعد بلا شروط | بقلم الكاتبة المصرية أميرة محمد
كل مرة كان رد فعلك فيها مش مفهوم، كان وراه سبب واحد بسيط جدًا أنت محتاج أمان.
كلامنا ساعات بيكون جارح، مش لأنك قاصد توجع، بس لأنك مش عارف تقول "أنا خايف، أنا متلخبط من جوايا، أنا محتاج حد يحتوي قلقي".
بس المشكلة إنك كبير كفاية إنك متعرفش تطلب ده.
فبيطلع وجعك في صورة كلام صعب، يمكن يوصل، يمكن لا ؛ بس غالباً بيوصل بشكل غلط.
وده مش الحل.
الحل الحقيقي إنك تلاقي اللي يسمع خوفك من غير ما تحس إنك بتطلب كتير.
إحنا اللي صوتنا ساعات بيطلع غلط،مش لأننا وحشين،
بس علشان التعب بيغير ملامح الكلام.
إحنا اللي بنتكلم بنبرة عالية وإحنا أصلاً بننده على حد يشوفنا،
حد يحس إننا بنقول من جوانا "أنا تايه، أنا محتاج حد، أنا محتاج أمان."
بس ده مش معناه إن كل رد فعل غلط مسموح،
ولا إننا نتحمل التجاهل أو القسوة علشان نثبت إننا نستحق الأمان.
إحنا مش لازم نظهر ضعفنا علشان يتصدق وجعنا.
ولا نبرر وجعنا علشان نكسب احتواء.
إحنا مش بنطلب معجزة،إحنا بس عايزين حد يكون أمان من غير شروط.
حد لما نحس الدنيا بتوقعنا،نلاقيه بيقول من غير ما نطلب"أنا هنا ومش هسيبك."
بسيطه جدا وعلي اد أنها بسيطه ولكنها صعبه .
محتاجين نصدق إن فيه مكان في الدنيا دي، نقدر نكون فيه على طبيعتنا .
وإحنا كمان لما نلاقي الأمان،بنكون أجمل وأصدق ناس.
إحنا مش عايزين كتير،إحنا بس عايزين نرتاح من فكرة إن كل مرة نحس فيها بالخوف، لازم نلبس وش الشجاعة.
وكل مرة ننهار فيها، لازم نخبي الانهيار في نكتة أو سخرية أو عصبية مفاجئة.
الناس اللي زيّنا، اللي محتاجين أمان،
مش بيطلبوا معجزات.
بس بيستنوكم تلاحظوا وتقربوا من غير أحكام.
في حد جوا كل واحد فينا ،مستني بس لمسة حنية، كلمة بسيطة تقوله "أنا واخد بالي منك؛وإنت مش لوحدك"
فلو كنت يوم قادر تكون أمان لحد،ماتتأخرش.
ماتستناش إنهم يطلبوا،لأن مش كل اللي محتاج أمان بيقدر يقول.
اللي بيحس ويفهم بصمت هو الأمان الحقيقي.
كونوا الأمان اللي بتدوروا عليه.
وما تكونوش السبب في إن حد يتعلم يخاف من احتياجه.
Post A Comment: