متخليش اللي كسرك يحدد شكل حياتك | بقلم الكاتبة المصرية أميرة محمد
انا دايما بتأذي
انا محدش بيحبني
أنا حظي وحش
ليه دايما في فئه شايفه نفسها دائما الضحيه ؟
خليك متفق معايا حتي لوكنت من الفئه ديه ان مفيش حد يعيش حياته كامله بدور واحد وهو دور الضحيه .
"لو كنت دايمًا الضحية.. خليني أقولك حاجة من القلب"
أنا عارفة إنك تعبت.
كل مرة بتحاول تقوم، الدنيا بتوقعك.
كل ما تفرح شوية، حاجة تحصل تفكّرك إن الفرح مش ليك.
حاسس إنك دايمًا اللي بيتأذي، دايمًا اللي بيتساب، دايمًا اللي بيتفهم غلط.
وأنا مصدّقاك.
مش لأن كل حاجة ضدك، لكن لأني عارفة إنك من جواك شايل كتير،
ومش دايمًا بتلاقي اللي يسمعك بجد.
بس خليني أقولك حاجة؛
في فرق بين إنك تكون مكسور،
وإنك تتعود تبقى الضحية.
لما تتعود تعيش الدور ده، بتفقد حاجات كتير من غير ما تحس:
بتفقد قدرتك على التغيير؛ لأنك مصدّق إن مفيش فايدة.
بتبعد الناس اللي بتحبك ؛لأنهم مش عارفين يساعدوك.
وبتظلم نفسك؛ لما تختار تفضل في نفس الحتة، رغم إن جواك طاقة ممكن تغير كل حاجة.
انا ذيك ومعاك بس الفرق اني عرفت ان دور الضحيه ليس دور بطوله ولا دور نهايه القصه .
بل ممكن يكون هو نقطه البدايه لإنسان انضج أقوى و اصدق مع نفسه .
أنا مش بقول إنك بتبالغ،ولا بقلل من اللي حصلك،بس جايز اللي تعبك زمان،مش لازم يفضّل يتحكم فيك لحد دلوقتي.
جايز لو خدت خطوة صغيرة بس تقول فيها:
"أنا تعبت وعايز أبدأ أفهم نفسي، وأسندها، وأساعدها"
تكون بداية لنسخة منك أقوى، أهدى، وأحنّ على نفسك.
أنت تستاهل تكون بخير.
بس لازم تصدق إن ده ممكن.
جملة أخيرة، من القلب:
اللي حصل لك مش ذنبك.
بس اللي هيحصل بعد كده، هو قرارك.
ماتخليش اللي كسرّك يبقى هو اللي يحدد شكل حياتك.
أنت اقوي من انك تعيش ضحيه .
Post A Comment: