⚫️مفيش بيت مفيهوش طفل بيكح الأيام دي
تعالوا نفهم أسباب الكحة و ممكن نعمل ايه معاها
أولا لازم نفهم أسباب الكحة علشان نعرف نتعامل معاها.
⚫️إذا الطفل عنده دور رشح جامد بسبب أي ڤيروس بنلاقي الطفل ابتدي يكح كحة كده مليانه افرازات طبعا سببها ان افرازات الانف بتنزل كتير علي ورا و الرضيع مش حيعرف يطلعها بره
فتبتدي الكحة
في الحالة دي مهم جدا غسيل الانف ببخاخ ماء بحر و شفاط انف بانتظام
انا بفضل الانواع اللي ليها فلتر و انبوبة سهلة و ممتازة جدا.
⚫️طيب إذا الطفل بيرشح طول فترة الشتا و مخليه مش موقف كحة فده غالبا سببه حساسية
خصوصا اذا فيه تاريخ عائلي
في الحالة دي لازم نعالج الحساسية صح و ناخد علاج وقائي علشان الطفل يبطل يكح.
بخاخات الانف لا بتسبب تعود و لا ليها اضرار خالص طالما باشراف طبيب.
⚫️فيه كحة بقي بتظهر شبه صوت الديك
دي بتكون بسبب إلتهاب الأحبال الصوتية
و غالبا بتصحي الرضيع أو الطفل باللي من عز النوم مش عارف يتنفس
اول ماتطلعيه في هوا الشارع في الحالات البسيطة بتفك علي طول
اذا شديدة لازم طوارئ و جلسات استناق ب Racemic Epiniephrine
⚫️ نيجي بقي لكحك حساسية الصدر
و تزييق الطفل
دي بتكون كحة مزمنة و لازم علاج وقائي بداية من المونتيلوكاست في الحالات
البسيطة حتي البخاخات اوجلسات البالميكورت طبعا بيحددها الدكتور حسب شدة الحالة.
⚫️الكحة اللي بسبب التعاب الشعب الهوائية Bronchitis or Bronchiolitis
هي ڤيروسية ليس لها مضاد حيوي و الحالات الشديدة اللي الطفل نفسه بيقفل تماما او بيوقف رضاعه و اكل بيحتاج حجز مستشفي علي طول.
أما الاتهاب الرئوي فهو بكتيري و ممكن يحصل كمضاعفات لدور ڤيروسي
علشان كده انا بنصح كل ام طفلها بيكح
بلاش تستني لما الدور يتفاقم
دكتور يسمع صدره و يتابع تطور الدور.
⚫️فيه رضع و اطفال في بداية سن
المشي بيقعدوا يكحوا كحة
متواصلة و بدون مقدمات و لما تتكلم مع الاهل بتلاقي ان الطفل شرق في اكل
زي لب أو كان بياكل فاكهة ببذر
فطبعا دخلت في مجري التنفس
الادوار اليومين دول رزلة و عنيدة و فيه منها مقاوم للعلاج فبلاش نستهون.
⚫️من ضمن أسباب الكحة اللي مش كله بياخد باله من سببها هي الكحة بسبب وجود ارتجاع عند الرضيع أو الطفل و يفضل يتهبد مضادات و أدوية كحة
مع إن حلها علاج الارتجاع و الطفل يرتاح تماما
⚫️تكرار الكروب أو التهاب الأحبال الصوتية باستمرار عند الطفل بيكون حساسية أو مشكلة في الأحبال الصوتية ببتتشخص
بمنظار ( عند انف و اذن )أو برضه ارتجاع شديد
و مهم نحلل كالسيوم في الحالات دي
🛑 طيب نيجي لأدوية الكحة:
❌ الأدوية المهدئة للسعال ممنوعة قبل ٥ سنوات
✔️الجلسات في حالات حساسية الصدر بيحدده الدكتور حسب الطفل و حالته ووزنه
✔️البخاخات الوقائية سواء لحساسيةالصدر أو الأنف هي الحل الأمثل و الأأمن لطفل الحساسية.
حقوق الكتابة محفوظة
د/ غادة صلاح الصياد
ماجستير طب الأطفال- كلية الطب-جامعة الأسكندرية
أخصائي طب الأطفال و حديثي الولادة
تغذية الأطفال
صفحات الفيس بوك والانستجرام: انقر الروابط 👇🏻
Post A Comment: